"О́ner degenimiz – únemi izdenis jáne árdaıym alǵa jyljýdan turady. Osyǵan oraı Abaı atyndaǵy qazaq mýzykalyq drama teatry jyl saıyn óz jetistikterimen qýantýda", deıdi Abaı teatrynyń ádebıet bóliminiń meńgerýshisi Eńlik Samatova.
Bıyl Atyraý qalasynda ótken «Máńgilik eldiń altyn adamy» atty respýblıkalyq teatrlar festıvalinde, Abaı teatrynyń dırektory Baýyrjan Túlekov basty roldi somdap, «Adasqan baq qusy» spektaklindegi eńbegi úshin «Eń úzdik er adam beınesi» nomınasııasyna ıe boldy. Sonymen qatar teatryń akteri Saparbek Áshimbekov «Eńbek ardageri» medalimen marapattalypty. Bıyl teatr óziniń 84-shi maýsymyn Sultanáli Balǵabaevtyń komedııalyq janrdaǵy «Eń jaqsy erkek» shyǵarmasymen ashty. Rejısser Sultan Sraılov qoıǵan spektakl kórermen yqylasyna bólenip, óziniń joǵary baǵasyn aldy. Avtor pesada qazirgi qoǵamdaǵy ózekti problemany astarly ázilmen jetkizýge tyrysqan. Oqıǵa Alpan keıipkerdiń boıjetkenderge kóz salýy, sóz salýy arqyly órbip, «Báısheshek» klýbynyń bir top qyzdary osy máseleni sheshý maqsatynda is-áreketke kóshedi.
Sahnada Alpannyń qonaq bólmesi. Sýretshi Natalııa Erchıhına oqıǵa barysyna sáıkestendirip, zattardy yńǵaıly etip ornalastyrǵan. Sonymen qatar akterlerdiń kıimin de obrazǵa saı tańdalyp, keıipker harakterin ashýǵa septigin tıgizýde.
Alǵashqy kóriniste rejısser Alpan men Gúlmaıdannyń baqytty, qýanyshty ómirin beıneleıdi, keıin «Báısheshek» klýbynyń qyzdary kelgen sátten Alpannyń qupııasy ashyla bastaıdy. Basty roldegi Azamat Nurǵamys pen Sulýshash Tólekova arasyndaǵy akterlik dýet qoıylym deńgeıin arttyra tústi. A.Nurǵamys birde salmaqty depýtat, jigittiń sultany bolsa, birde Mádına-Magdalına basyn dýalaǵan sátten áıel jandy erkek bolyp shyǵa keledi. Bul kórinis arqyly akter ózin san qyrynan kórsete bilgen. Buǵan deıin de komedııa janryndaǵy «Sotanaıdyń sońǵy úılenýi»(О́.Boranbaev), «Úılený» (E.Jýasbek) t.b spektaklderde oınap, akterlik sheberligin shyńdaı tústi. Al, Gúlmaıdan rolindegi Sulýshash Tólekova keıipker kelbetine saı erekshelikti, ár is-qımyldy nanymdy oınap, joǵary deńgeıde alyp shyqty.
- Árıne qoıylymda basty júk akterge túsedi. Avtor oıyn, rejısser ıdeıasyn, barlyǵyn ushtastyryp alyp shyǵý jaýaptylyǵy akterge júkteledi,-deıdi ádebıet bóliminiń meńgerýshisi Eńlik Samatova,-Baqyt Toıymbaeva bastaǵan «Báısheshek» klýbynyń bir top qyzdary spektakldiń kórkin kirgizýde. Qandaı qoıylym bolmasyn, tipti ekinshi plandaǵy keıipkerdi oınasa da kózge túsetin Dámetken Idrısova, bul joly ekstrasens-emshi rolin somadady. О́zine berilgen roldi asqan sheberlikpen oryndap, erekshelendirip kórsetýge tyrysady. Sondaı talantty aktrısalardyń biri Nazym Murathanova. Onyń keskin-kelbeti, syzyla sóıleýi, is-áreketi, kózqarasy sylqym áıelge tán qubylys. Aktrısa keıipker janyn boıyna sińirip, sheber kórsete aldy. «Báısheshek» klýbynyń meńgerýshisi rolindegi Baqyt Toımbaevanyń jáne jýrnalıst Rozabaný rolindegi Ásem Turlybekovanyń keıipker somdaýdaǵy sheberligin spektakl barysynan ańǵara alamyz. Shyǵarmada oqıǵa týdyrýshy keıipkerlerdiń biri - Látıpajan jáne Aılázzat. Alpanǵa ǵashyq qyzdardyń bireýi óleń joldaryn arnaǵan aqyn bolsa, bireýi myń buralǵan bıshi. Látıpajan rolindegi Aqerke Rızabekova qııal áleminde júretin sezimtal qyzdy joǵary deńgeıde beıneledi. Al, Aılázzat atty keıipkerdi oınaǵan Aıaýlym Turysbekovanyń akterlik sheberligi bir bólek. Shyǵys bıin bılegen aktrısanyń plastıkasy, tempo-rıtmi ózgelerden erekshe. Jáne rol shyǵarýda asa jaýaptylyqpen qarap, daralanýǵa tyrysady.
Jalpy rejısser akterlermen tyǵyz jumys jasaı otyra, avtordyń negizgi ıdeıasyn alǵa tartyp, zamandas beınesin búgingi qoǵamǵa kórsete bilgen eken. Kórermenniń kóterińki kóńil-kúıde, úzdiksiz soqqan qoshemeti spektakldiń joǵary deńgeıde ótkendigin ańǵartty. Abaı atyndaǵy qazaq mýzykalyq drama teatry osylaısha sapaly qoıylymdarymen árqashan kórermenderin qýantyp keledi.
Raýshan Nuǵmanbekova,
Semeı
Sýretti túsirgen avtor